政情：鄭志剛同「林瘋」係師兄弟
令萬千球迷瘋狂嘅美籍華裔NBA球星林書豪（Jeremy），明日抵港展開為期五日嘅香江之旅，今次係Jeremy一炮而紅後首次正式訪港。飲頭啖湯請佢來港嘅新世界發展執行董事兼聯席總經理鄭志剛（Adrain）透露，佢同Jeremy係哈佛大學嘅師兄弟，雖然素未謀面，但Jeremy名下基金亦好關注青少年，同佢集團嘅「飛躍新世界」計劃不謀而合，故邀請師弟來港出席周五嘅啟動儀式，並與青少年對話。
Adrain話，爸爸鄭家純主力關注社會扶貧，佢就特別關心基層兒童及青少年，希望免費招募基層小朋友，透過游泳及打籃球培養不屈不撓嘅精神，提高自信心。
Adrain細個時都係小飛魚，佢坦言當時曾經有諗過放棄，但最後都決定堅持落去，最終取得全校總冠軍，所以佢最明白體育精神十分可貴。