政情：林鄭珍藏微縮模型有得睇
外號「好打得」嘅政務司司長林鄭月娥，原來都有童真一面，會儲得意嘅微縮模型，佢仲將兩件珍藏品借畀規劃署新開嘅「展城館」展覽，就係有香港六、七十年代懷舊特色嘅「亞陳麵檔」同「小食檔」模型。不過，原來呢兩件模型上面都有「香港老大街」嘅標誌，莫非係林鄭三月為香港老大街主禮時，海洋公園送畀佢嘅紀念品？
展城館係香港第一個以規劃同基建發展做主題嘅永久展覽館，林鄭同發展局局長陳茂波尋日主持展館開幕。展城館地下舉行緊「獨特的香港縮影」展覽，展出三十二件以懷舊香港為題材嘅模型，除咗林鄭借出嘅兩件珍藏外，仲有雷生春、華富邨、九龍城玩具檔、灣仔舊唐樓等等。
除咗有模型睇之外，展城館仲有五十五件互動展品同短片介紹香港過去同未來嘅規劃發展，展館明日就會正式免費開放畀市民參觀，想一睹林鄭私人珍藏嘅市民去到記得要留意一下喇。