政情：吳傑莊搞社企 幫鄉親脫貧
萬事起頭難，對於創業人士嚟講，最重要係起步嘅一筆錢。金至尊數碼行政總裁吳傑莊（Johnny）有見家鄉中山唔少想創業嘅年輕人，因為太貧窮而得唔到銀行貸款，決意聯同中山青年協會一班兄弟，首創「微額貸款」社會企業，幫鄉親創業脫貧。
Johnny仲邀請到○六年諾貝爾和平獎得主、孟加拉銀行家穆罕默德‧尤努斯（Muhammad Yunus）擔任社企顧問添。
Johnny日前到廣州出席一個論壇上認識到尤努斯，發覺大家嘅理念好一致，好快就合作搞社企，將中山打造成社會組織孵化基地。尤努斯係提出「微額貸款」概念嘅始祖，曾經喺孟加拉幫助過無數人脫貧，今次打算將呢套模式「移植」到中山。Johnny透露，九月中將會帶隊上北京清華大學，學習構建社會組織，原來佢八年前喺清華修讀計算機工程博士畢業，今次以團長身份重遊舊地，分外親切。