政情：白鴿「起義」謀踢走鐵頭仁
民主黨（白鴿黨）領導層年底就會換屆改選，正當外界以為黨主席何俊仁（鐵頭仁）會坐多兩年之際，原來一班黨員正密謀踢走呢位醜聞纏身嘅黨主席，令鐵頭仁能否連任存在好大暗湧。據聞有唔少黨員認為，應該推選另一人代替鐵頭仁做主席，皆因鐵頭仁負面新聞多多，根本無顏面繼續連任，但邊個可以接任呢？有黨員就諗住以今屆選舉成績做評分，總之邊個得票率高，就邊個做主席。
白鴿黨主席呢個位，多年來都係由幾位老鴿核心主持，就算幾年前鐵頭仁當選黨主席，都要得到呢幾位老鴿撐腰至得，但隨着今年底改選，呢個核心集團將面對瓦解危機。事關鐵頭仁近期醜聞被愈揭愈臭，包括多年來隱瞞白鴿黨總部並非黨產，又漏報多間公司股份，更利用漏報公司買賣物業獲利，唔少黨員都擔心，鐵頭仁再連任黨主席嘅話，該黨形象只會愈嚟愈差。
選舉成績定主席誰屬
其實黨高層都意識到鐵頭仁醜聞纏身嘅問題，所以曾經有聲音希望張文光接棒，因為佢資歷深又壓得住場，由佢做主席應該冇太大反彈。不過，最慘係上月發生咗意外，教協馮偉華因病退選立法會教育界選舉，改由一個非白鴿黨黨員頂上，聽聞張文光為咗令白鴿黨繼續幕後掌管教協，未來要花更多時間落教協身上，所以分唔到身做黨主席。
近日就有黨員建議由副主席劉慧卿接替鐵頭仁做主席，如果卿姐可以喺選舉取得好成績，相信可說服黨員接受。但就算白鴿黨換新主席，都唔代表該黨黨員嘅醜聞可以當粉筆字咁抹晒，該黨好應該一次過清楚交代涉及嘅醜聞，或者係由執法部門介入調查，查個水落石出。超級區議會候選名單仲有劉江華、李慧琼、陳婉嫻、馮檢基、涂謹申及白韻琹。九龍西候選名單仲有梁美芬、毛孟靜、譚國僑、蔣麗芸、黃毓民、林依麗、黃以謙及黃逸旭。