中環出更：90後山區義教 個個獨當一面
九十後經常被人詬病，但唔好一竹篙打晒一船人，好似香港青年聯會賢慧社上星期就帶領一班九十後義工，去咗清遠連山壯族瑤族自治縣義教，身為香港籌委會名譽團長嘅賢慧社副召集人周沁，樂見成班義工個個都獨當一面。
今次行程名為「賢德牽學子，慧心澤連山」嘅五日四夜義教之旅，來回車程接近十七個鐘，但都無損各人嘅熱心。
賢慧社周沁 洗滌心靈
周沁話，義工團入面有唔少都係英文系同教育系嘅學生，加上有專業嘅課程指導，所以義教過程相當順利，佢哋以活動教學形式教低年級同學英文，而高年班方面就會教授拼音同詞彙。班義工仲自備色彩繽紛嘅教材，務求令同學可以喺開心愉快嘅環境下學習。
見到班義工咁踴躍，周沁話好似見番自己嘅大學生活咁，加上同一班咁純樸嘅小學生一齊，令佢有一種洗滌心靈嘅感覺。不過，佢最開心都係成班九十後義工喺義教後有所得着，明白幸福唔係必然，令佢有一種生命影響生命嘅感覺，因為賢慧社影響班義工，義工就影響班小學生，教學相長。
經過今次嘅旅程，周沁發現原來好多山區嘅軟件都未做到最好，好似佢哋飲用嘅水都係硬水，好多小朋友飲後出現腎石，希望將來可以改善情況，佢又希望再到唔同地方，服務更多有需要嘅人。
卓妮