在家靠父母，出外靠朋友，攞着數更加靠朋友，如果你有位高權重嘅尊貴朋友，你甚至有機會富貴榮華發大達。
呢嗱嗱嗱，朋友真係好鬼死重要o架，好似美國總商會前主席詹康信咁吖，如果唔係同前特首曾蔭權老友鬼鬼，應該冇可能攞到咁多着數囉。之不過咁，攞着數還攞着數，唔好理虧又違規嘛。
詹康信最近就被本報揭發涉嫌三違規，引來三個相關政府部門展開調查。事件嘅來龍去脈係咁嘅，壽臣山深灣徑十八號有八個防空洞，前身係英軍軍火庫，擁有超過七十年歷史，屬於三級歷史建築，詹康信以便宜到極嘅價格租咗嚟用，改為全港第一個防空洞酒窖Crown Wine Cellars。租金有幾便宜呢？月租只係區區二千七百元，抵到笑。及後去到一○年，輿論嘩然之下政府先至重新公開招標，詹康信公司再次中標，月租調升至六萬元。
着數就攞咗嘞，詹康信點樣三違規呢？首先係僭建，屋宇署發現防空洞酒窖存在若干僭建物，包括露天停車場同玻璃屋毗鄰地方違規加建，由於僭建物屬於優先取締類別，署方已經發出清拆令。
第二樣違規係違反租約，租約講明只可以用作葡萄酒會社或儲存葡萄酒，之但係酒窖居然租畀其他公司舉行會議，甚至租畀新郎新娘舉行婚禮。至於第三樣違規咯喎，就係招攬非會員光顧用膳，仲要收取加一服務費。
詹康信咁斗膽掛羊頭賣狗肉，原因心照不宣啦，恃住有曾蔭權撐腰吖嘛。所以話啫，官商勾結也好，曾商勾結也罷，利益輸送呢家嘢確係非常之咁可惡。喂，點解識得權貴就有着數，識佢條毛就要瞓街？曾門酒肉臭，路有凍死骨，瞓天橋底嗰一班流浪漢，同貪遍海陸空嘅煲呔曾三唔識七，莫講話冇資格以便宜價格租用酒窖，連租個似樣少少嘅斗室蝸居都冇本事呀，該你個煨！
講到呢度，又係時候問候一下廉政專員公署嘅新老頂白韞六。專員呀專員，究意調查曾蔭權貪污瀆職有乜進展冇呀？連串醜聞揭發至今都半年啦，點解調查行動仍然係龜行蝸步o架？你唔好同功夫茶講，權貴真係有逍遙法外嘅特權呀，嫉惡如仇嘅正義香港人同你死過都有之！
至於貪曾朋友詹康信攞完着數又違規，呢一筆爛帳真係要算一算，不但要撥亂反正，更加要儆惡懲奸。你知啦，廉潔奉公作為香港嘅核心價值，已經由於貪曾禍港而敗得七七八八，唔可以再容許呢個過氣特首嘅豬朋狗友繼續敗家！