○五年政改方案投下關鍵反對票嘅前會計界立法會議員譚香文（Mandy），九月捲土重來參加九龍東直選。Mandy尋日表明，對民主黨（白鴿黨）喺一○年支持政改方案好不滿，仲講到明趁住該黨李華明放棄連任，佢會去該黨九龍東嘅觀塘票倉搶票，目的係要畀泛民支持者有其他選擇，希望殺出一條血路。
Mandy又希望泛民能夠喺九龍東爭取到三席，但就唔包括激進泛民喎。咁就奇喇，九龍東五條泛民名單之中，如果撇除兩條佢口中所謂嘅激進名單，白鴿黨胡志偉有機會當選，但佢又話要去搶白鴿黨啲票，係咪有啲矛盾呢？再者，佢聲稱自己服務地區十幾年，有實力勝出，毋須「鎅」其他黨派或候選人啲票喎，究竟佢想表達啲乜呢？
早前有傳同內地關係密切人士想畀錢Mandy參選，但佢當日一口拒絕，因估計對方係想泛民互相廝殺，令某啲獨立人士得益。Mandy話從來冇收過錢，仲要按咗自己層樓參選添。九龍東候選名單仲有謝偉俊、梁家傑、陳鑑林、黃國健、陶君行、黃洋達、嚴鳳至。