政情：徐英偉北上讀書 拜拜官場
前民政事務局局長政治助理徐英偉（Caspar）離開上屆政府後靜咗一排，早前突然傳出佢曾應徵做將成立嘅文化局副局長，與盛傳做文化局局長、現任民政事務局副局長許曉暉「拍住上」，正當大家以為Caspar去向明朗化之際，原來事件有新發展，Caspar自爆會喺九月立法會選舉投票日嘅翌日到上海復旦大學讀書，間接否認咗佢重返官場嘅傳聞。
本身係民建聯成員嘅Caspar，○八年獲黨推薦加入政府做政助，外界對佢嘅工作口碑都唔錯，但Caspar無因而忘本，懂得飲水思源，七一離開政府陪咗太太出外旅行兩個禮拜後，隨即返港以「義工」身份幫手助選，又表明黨內只要邊張名單開到聲，佢都會義不容辭去幫手到投票當日喎。
至於立法會選舉後又有乜動向呢？Caspar自爆喺上月收到上海復旦大學通知，下月十日入讀國際關係與公共行政學院博士課程喎。佢又話，自己喺首個學期會讀多啲學分，希望可以快啲讀完返港陪太太同囝囝喎。