政情：胡劍江余德淳盼人人有品
學生哥正歎緊悠長暑假，但係啲大人就日以繼夜吵翻天，爭論究竟要唔要設立國民教育科。參與推廣香港有品運動多年嘅潮洲商會副會長胡劍江（Michael）就話，國以民為本，加強未來主人翁嘅道德教育，一定無錯。所以佢最近夥拍「EQ大師」余德淳（Charles），向政府申請成立「信愛慈善基金」，希望號召社會上推廣品格教育嘅機構，發揮化零為整嘅爆炸力，改變香港人急功近利嘅心態。
Michael同Charles經常對社會百態交流意見，開設訓練機構嘅Charles話，以前佢做中產家庭嘅講座為主，最近開始走入欠缺社會支援嘅社區，幫助弱勢嘅小朋友建立品格，教識佢哋尊重自己。Michael就話，小朋友嘅可塑性高，所以佢哋特別針對小四學生，希望教好下一代。身為胡良利珠寶後人嘅Michael，仲不失商人本色話，如果計算犯罪等社會成本，其實條數好抵，值得投資喎。