政情：鄉紳民記交惡 張學明成磨心
鄉事派一向都係香港政壇不可忽視嘅一股勢力，皆因佢哋人多、票多、錢多，以往民建聯喺鄉事派支持下，新界嘅議席可以話係唾手可得，但今時唔同往日，鄉事派已經公然同民建聯反面，新界東、西嘅鄉事派九月立法會選舉亦有自己支持嘅人選，嚟緊十九日仲會搞個誓師大會，為兩區鄉事派候選人造勢。據聞到時仲會有人向身兼民建聯嘅鄉議局副主席張學明逼宮，要佢放棄民建聯，表態支持鄉事派。
學明早前接替鄉議局主席劉皇發，出任行政會議成員，同時亦放棄已經做咗八年嘅新界西立法會議席。本身係新界社團聯會（新社聯）榮譽會長嘅學明，今屆支持兩個來自新社聯、但打正民建聯旗號參選嘅候選人。呢個決定起初都冇乜爭議，點知人算不如天算，鄉事派同民建聯去年區議會選舉後全面交惡，學明自然成為磨心。
「黑金政治」令關係全面破裂
我哋之前講過，鄉事派今次選舉罕有咁同西環對着幹，新界兩個選區都有鄉事派代表出選，雖然如此，學明仍然維持支持民建聯嘅決定，令到鄉紳們大為不滿，對此早有微言。直到報名前夕，有民建聯候選人走去執法部門投訴新界西有「黑金政治」，矛頭直指元朗鄉紳，雙方關係全面破裂，鄉紳們打算喺十九日誓師大會上向學明逼宮，要求佢喺民建聯同鄉事派中二選一。
唔單止咁，政府決定下屆區議會取消委任制，屆時學明不能夠再以委任議員身份擔任大埔區議會主席，於是有傳佢想「翻閹」做大埔鄉委會主席，以當然議員身份繼續做區議會主席，於是惹來部分鄉紳不滿，事關鄉委會主席一職向來係排住隊上位，如果忽然有人插隊話要做主席，即係代表副主席上位無期。
現時學明正處於人生交叉點，無論點決定都順得哥情失嫂意，究竟佢今次能否一如以往運用高超嘅政治手腕化解危機呢？鄉事派嘅逼宮行動最終又係唔係成事？大家就要拭目以待喇。