中環出更：余健志跑步保纖腰
近年喺飲食界人氣急升嘅私房菜靚仔廚神余健志（Jacky），經常喺社交網站facebook張貼無數美食照，日日係咁食，點解佢食極都唔肥？Jacky就向卓妮解開秘密，佢笑言要保住纖腰係要付出代價嘅，就係佢幾夜收工、點攰都好，隔日放工後就出街跑步，絕不偷懶。所以世上係冇不勞而獲嘅事，想修身嘅女士們聽到未？
私房菜將落戶上海
內地商機無限，近年唔少港商都北上投資，原來Jacky都計劃到上海開設首間內地分店，落力賺人仔。Jacky話，自私房菜開辦以來，生意有增無減，早有北上開分店嘅想法，咁啱上海淮海路正興建新商場，又有意吸納香港品牌打響名堂，雙方於是一拍即合，暫定於明年初開張大吉。問Jacky怕唔怕去到咁遠開舖，食物水準會有參差？佢坦言自己冇可能長駐上海，已經搵咗信得過嘅師傅上場，佢就負責設計菜式同管理工作，應該問題不大。
卓妮