中環出更：揚帆演奏 郎朗食定暈浪丸
曾喺○八年北京奧運開幕式上獻技嘅鋼琴王子郎朗，今屆倫敦奧運再Encore，日前喺由中國開往倫敦嘅「歡天藍舵號」帆船上彈奏美妙樂章。原來今次係郎朗首次喺海上演奏，但佢早有準備，食定暈浪丸，免得表現失準。
呢艘帆船款式係三桅帆船，夠傳統，喺奧運開幕前，已由中國緩緩駛往倫敦。船上賓客僅得三十人，名單精挑細選，包括郎朗爸爸郎國任、郎朗契姐兼港島婦女聯合會主席張雅麗（Carol）及郎朗音樂學校理事陳妙蘭外，跳水公主郭晶晶亦孖住未婚夫霍啟剛同未來老爺霍震霆去聽音樂，而政商界貴賓就有中國駐英大使劉曉明、招商銀行行長馬蔚華及國際奧委會副主席于再清等，粒粒皆星。
眾人喺倫敦時間七月廿八日中午上船，大會本來安排郎朗喺泰晤士河上演奏，可惜艘船放咗鋼琴後，重到駛唔郁，只好將船泊喺河邊一個碼頭。不過，船身始終有輕微搖晃，郎朗怕暈船浪令彈琴表現失準，開騷前食定暈浪丸，果然無暈又無嘔，認真醒目。
晶晶啟剛形影不離
演奏會上，郭晶晶同啟剛全程形影不離，郎朗知道佢哋十一月結婚，親自上前恭賀。聽聞晶晶向來係郎朗粉絲，未知大婚當日，會唔會請郎朗去彈番首結婚進行曲呢？
卓妮