立法會選舉提名結束，擔櫈仔，掗頭位，爭崩頭，好好睇。今年九月九日立法會移燈換櫈，選舉情況有幾咁爭崩頭呢？就咁，地區直選競爭比上屆更加激烈，六十九份名單二百幾人競逐三十五個議席，平均六人爭一席，多過上屆嘅四點七人爭一席。即係話，一人當選，五人崩頭。
當中又以新界東競爭最慘烈，二十份名單參選競逐九個席位，平均八個準政客爭奪一個月薪將會加至八萬元嘅議席。其次係新界西，平均六點一人爭一席。至於功能組別咯喎，當然冇乜競爭氣氛啦，因為不少席位只有一條友孤伶伶角逐。功能組別估計有十六人自動當選，爭都唔使爭，完全唔會出現崩頭場面，除非當選人樂極忘形儀態盡失，笨手笨腳跌低。
選舉嘅情況大致就係咁，選民嘅心態又係點嘅呢？功夫茶提提大家，立法會有一個花名叫做垃圾會，裏面真係有唔少白逗人工嘅垃圾議員o架，九月九日不如利用手上嘅神聖選票搞一搞衞生，掃垃圾，洗邋遢。
立法會議員表現有幾不堪，小市民心裏有數。民意調查顯示，對議員整體表現嘅不滿程度，由一九九八年大約一成六急升至去年約五成。基本上議員有三大弊病，一係懶，二係煩，三係爛。
眾所周知，立法會有四大懶蟲，霍震霆、李國寶、劉皇發同黃宜弘開會出席率低到冇朋友，質詢接近零，動議幾乎無。比較托賴嘅係，四大懶蟲其中三位放棄角逐連任，原因之一係「政治浪費時間」，原因之二係「唔知議會運作」，原因之三係「阿爺睇唔過眼」。
至於講到煩喎咯，部分議員非常熱衷於玩拉布，日以繼夜、夜以繼日再日以繼夜疲勞轟炸，令到議會陷入癱瘓狀態。選民需唔需要咁煩嘅議員阻住地球轉呢？大家投票之時真係要諗諗嘞。
最令功夫茶火滾嘅係爛到透嘅保皇擦鞋仔，傾盡全力為香港第一貪官保駕護航。喂，貪遍海陸空嘅前特首曾蔭權點解逃得過彈劾同不信任動議呀？咪就係保皇擦鞋仔從中作梗囉，唔理三七二十一不問是非黑白，一嘢否決彈劾同不信任動議，任得貪曾逍遙法外。呢一種爛議員，九月唔當垃圾掃走都冇天理啦。
另一種爛議員專門維護淫媒，受人錢財替人消災。壹傳媒推出免費報紙《爽報》誨淫誨盜販賣色情，立法會公審之時，收咗淫賤黎政治捐款嘅政客裝聾扮啞，置公眾利益於不顧。
即係咁，身為選民嘅你，九月立法會改選最好獻出英明抉擇，懶嘅議員要掃走，煩嘅議員要掃走，爛嘅議員更加要大大力掃走！