政情：大舞台：劉夢熊：港府有兩個老闆

國民教育爭議方興未艾，全國政協委員劉夢熊尋日出席一個中學生通識辯論比賽時，就話連佢都反對急於推行國民教育，強調人民唔係單靠課堂去學習愛國，亦要睇內地政府嘅所作所為，包括李旺陽、趙連海同陳光誠等事件。佢又話喺「一國兩制」下，特區政府有兩個老闆，一個係中央政府，一個係七百萬港人，要編寫出兩個老闆都滿意嘅國民教育教材，認真唔容易，一語道盡梁振英政府嘅難處。