近期政界流行翻舊帳，發展局前局長麥齊光被揭廿幾年前涉嫌騙取租津，最終搞到落台收場。報咗名參選超級議席嘅民主黨涂謹申，近日亦畀人翻舊帳，而且唔係廿幾年前，係足足逾卅年前嘅事。
署名「九華校友」嘅人投訴阿涂，話佢讀中四做九龍華仁郵學會副會長時盜用會費，到中六做學生會會長時，再因為帳目不清，做唔夠半年就極速落台，破晒該校紀錄，不過當年九華神父出名仁慈，先幫佢寫推薦信保送入港大讀法律。
雖然「九華校友」無證無據，但本住求真精神，我哋都問番阿涂有無發生過咁嘅事。佢一聽到後即刻笑咗出嚟，話呢位「校友」每逢選舉年，就會寫信投訴佢，已經唔係第一次聽到。佢話郵學會同學生會都設有司庫，盜用會費咁大件事，又點會無人知呢？阿涂仲話，最好笑係九華神父當年根本無幫佢寫推薦信，證明呢位校友噏得就噏。
阿涂估計呢位校友隔咗卅年都記住呢啲事，當年一定同佢有過節，唔知係咪當年競選郵學會會長時輸咗畀佢嗰位同學。做人連卅年前讀中學時嘅恩恩怨怨都記得咁清楚，其實都好辛苦囉！