政情：KK火影上身「鏢」準工時
香港動漫節啱啱先落幕，參選九龍東嘅工聯會黃國健（KK）為咗食住個勢幫自己助選，尋日都連同佢參選名單上嘅工聯會成員，喺藍田街頭大玩cosplay（角色扮演），其中KK扮演動漫人物《火影忍者》中嘅「火影」，話要爭取為標準工時立法。
之不過，呢位花甲忍者掟出道具武器「準時進修精準鏢」，竟然先要搵一位「黑影」同事接住，然後用人手運送貼喺個箭靶度，擺明造假，劇力同說服力都立即大減。
KK為咗選舉，臨老都要同班後生玩cosplay，不過工聯會另一成員、原本打算出選九龍西嘅周聯僑就冇份玩喇，因為工聯會已決定唔派人加入九西混戰。
工聯會榮譽會長鄭耀棠堅稱周聯僑唔係畀西環勸退，只係佢哋評估過形勢，覺得冇把握先自願棄選喎，真係好難令人相信囉！