政情:保釣攔路示威殃及池魚

出位示威無疑可吸引眼球,但亦要冒上風險,甚至得不償失。話說保釣行動委員會尋日趁行政會議開會,再度去特首辦請願,要求政府解除對保釣船駛離香港水域嘅禁制令。佢哋一行七人晨咁早到咗特首辦門口,不但拒入示威區,仲將幅橫額掛咗喺車閘上面,等到攰攰地更坐埋喺車路,嚇到班警察同保安大為緊張,相當「識做」咁叫班行會成員改由另一車閘進入,結果途經示威區接請願信嘅行會成員寥寥可數,令佢哋反而少咗表達意見同曝光嘅機會。

不過,最激氣嘅應該係畀保釣殃及池魚嘅同場示威人士,有示威者等極都唔見行會成員,嬲嬲地開始失控,公開質疑其他示威者嘅訴求。例如有人無端端向中港家庭權益會挑機,話佢哋中港通婚,一早就預咗無床位生仔喎,中港家庭被踩到上心口,當然即刻叫陣回敬,互罵一輪。