政情：泛民三子 渾水摸魚
選舉策略五花八門，估唔到連幾時正式報名參選都變成招數之一。今屆建制派喺功能界別內鬥，有啲界別有成五名建制人士參選，泛民就係睇中呢點，諗住嚟個博大霧，好似泛民嘅衞星組織公共專業聯盟，尋日就唔聲唔聲，靜雞雞派出三人報名參選。其中出選工程界嘅公民黨黎廣德，仲要懶神秘咁，報完名後繼續封口，係都要等到夠鐘截止報名，之後先開記者會講解詳情，擺明想收漁人之利，等班建制派鬥餐死再執雞。但黎廣德之前講過今屆唔會參選，今次咁樣反口，佢份人係點，相信選民好清楚。
截止後宣布 防西環變陣
尋日係立會選舉提名期最後一日，好多人都作最後衝刺報名，我哋早兩三日開始，已經不停打畀啲有機會參選嘅人士，睇下佢哋會否同幾時報名，黎廣德當然係其中之一啦，不過佢一係唔聽電話，一係接去留言信箱，似係做緊秘密行動。最後真係畀我哋估中，尋日大約兩點鐘，有記者收到黎廣德競選團隊嘅電話，話五點鐘會開記者會，但究竟係咪宣布參選，團隊繼續支吾以對。
去到記者會，發現公共專業聯盟原來共有三人出戰，除咗黎廣德，仲有民主黨吳永輝出戰建築、測量及都市規劃界，以及甄文星角逐金融服務界。黎廣德喺記者會終於解釋，點解要最後一刻至報名，推說中聯辦一直喺背後做好多工夫，協調晒啲建制派人選，如果佢太早宣布出戰，中聯辦可能即刻會調兵變陣，所以先要咁低調。佢咁講都未必無道理，如果佢一早宣布參選，西環分分鐘會勸退工程界部分候選人，然後集中火力捧其中一人，以免分薄票源。
再睇真啲，原來黎廣德唔係以公民黨名義去選，而只用公共專業聯盟名義，唔通佢嫌公民黨嗰名太衰？雖然佢唔肯承認，但就好老實話，預計對手實會利用港珠澳大橋官司去攻擊佢，話佢阻撓基建發展，令業界無工開喎。睇嚟佢自己都好明白，同公民黨劃清界線，勝算可能會高啲。
呢招靜雞雞報名博大霧，以免對手集中火力狂攻，其實唔係泛民專用。年前民建聯劉江華參選區議會時，都係最尾一刻至頂上，費事畀對手狙擊，當時泛民都有人暗寸劉江華咁做係驚輸。泛民依家咁做，係咪有口話人無口話自己呢？