中環出更：鄭錦鐘炒單車 甩骹吊吊揈
香港地車多路窄，成日塞車，近年有愈來愈多市民改用單車代步，慳錢、慳時間兼環保健康，但涉及單車嘅交通意外亦隨之增加。卓妮早前見到身兼道路安全宣傳運動主席嘅保良局副主席鄭錦鐘（Eric），佢大爆自己都係單車意外受害者，至今猶有餘悸。
話說Eric讀緊小學四年級時，已經好鍾意踩單車，不時租車喺大坑東足球場踩番幾轉。有次佢租咗架單車，座位太高，但佢又懶得校低，最後搞到失平衡翻車。初時Eric以為只係好小事，點知一起身，發覺左手吊吊揈，原來係甩咗骹，返到屋企畀阿媽鬧餐飽之後，拿拿聲去睇跌打，至今隻手都唔能夠完全屈曲，掂唔到自己膊頭。
指落斜易失控「攬樹」
Eric成為道路安全宣傳運動主席後，有見近年愈來愈多市民踩單車，力促政府加強宣傳單車安全。佢指出，最常見嘅單車意外，並唔係同汽車相撞，而係自己落斜時失控「攬樹」受傷，起因係駕駛者防禦裝備不足，又冇定期檢查煞車裝置。所以佢以過來人身份呼籲大家，唔好忽視單車安全。