中環出更：黃仰芳住家菜款客減壓
香港人事事講求效率，好易壓力爆煲。身兼潮州商會青委副主任嘅新鴻基尊尚投資管理高級董事黃仰芳（Fonia），諗到好橋為顧客減壓，就係將公司打造成「家」嘅感覺。開試酒會之餘，仲搵埋煮得一手好菜嘅媽媽粉墨登場，炮製家鄉潮州美食佐酒，深受顧客歡迎。
諗到以住家潮州美食宴客，原來有段古。話說Fonia年前加入潮州商會，結識唔少鄉里，細談之下，發覺好多朋友嘅家人都唔識煮正宗潮州菜。自此Fonia經常趁媽媽下廚，帶多一份與老友分甘同味。黃媽媽非凡廚藝，大家一吃難忘。之後凡有聚會，枱上一定唔少得黃媽媽嘅撚手小菜。
「球精」愛旅行
Fonia自言，最愛食媽媽煮嘅豬腳凍及潮式春卷。唔好以為豬腳凍好肥膩，其實係用豬腳熬製兩小時，期間不斷撇走面層肥油，攤凍後形成啫喱狀，骨膠原豐富，成愛美女士最愛。潮式春卷則以開邊綠豆、蒜白及豬肉包成，黃媽媽堅持唔落味精，食落惹味而唔口乾。
除咗食嘢，Fonia愛以球類運動減壓，並笑言自己係「球精」，單計六月份就總共打咗十八日羽毛球，仲未計網球同乒乓波。除此之外，佢每年仲會去最少六次旅行，至今幾乎踏遍歐洲，未來仲計劃去東非肯雅睇野生動物添。
卓妮