開鑼開鑼！一年一度暑期盛事香港書展又開鑼！
咦，林林總總百花齊放，有乜嘢書好睇呢？今年規模歷屆最大，超過五百三十個參展商咁墟冚，花多眼亂喎，揀都唔識揀。咁啦，功夫茶誠意推介一本叫做《香城訣》嘅精彩小說，內容以時事為主軸融合武俠小說橋段，被喻為本港首部跨時空嘅政治武俠小說。至於小說主人翁咯喎，就係貪遍海陸空嘅前特首曾蔭權爵士嘞，請大家熱烈地彈琴熱烈地唱！
大家都知道啦，貪曾禍港七年，害處多到兩隻手都數唔晒，唯一好處係呢一位欲壑難填嘅哥哥仔，為一眾作家提供源源不絕嘅創作靈感。就好似《香城訣》咁吖，原本係《太陽報》專版Sun微博嘅連載小說，主要將貪曾任內最後歲月，即係今年二月起被東方報業集團連環揭發種種貪腐醜聞，至六月底卸任期間引發政治亂局以及荒謬現象，呈現於讀者眼前。小說分成十個章節，包括唐梁大戰、同門內訌、秋後算帳等等。
簡單咁講，如果唔係香港出咗一個勾結富商嘅貪腐特首，小說作家都冇可能下筆如神啦，《香城訣》真係值得各位「厭曾一族」大力捧場o架。負責出版嘅次文化堂社長彭志銘講到明，《香城訣》狂插貪曾，相信會成為書展焦點，每本售價七十港元，書展現場購買可獲八折優惠。
過去幾年嘅書展，焦點好多時候集中於o靚模洶湧澎湃嘅事業線，今年就唔同嘞，大會只收到一位o靚模舉辦簽名會嘅申請，並且已經批准。少咗轉移視線嘅豪乳崇拜，今年嘅焦點又係乜東東呢？同樣係事業線，不過係曾蔭權嘅貪腐事業路線圖，唔少參展商推出諷刺時弊嘅書籍，貪曾嘅成魔之路自然係各路英雄借題發揮嘅好選擇。亦即係話，數臭貪曾係今年書展嘅主旋律之一，創作力量之高簡直無與倫比，適合大家一睇再睇。
正如彭志銘所講，今年適逢政治年，既有特首選舉，又有即將來臨嘅立法會選舉，加上社會累積極大怨氣，相信政治書有一定捧場客。
計功夫茶話齋，既然曾蔭權為作家提供咁多創作靈感，不妨再醒多一個題材。即係咁，廉署正在調查煲呔任內種種貪瀆行為吖嘛，一旦調查完畢正式展開司法程序，貪曾如實招供任由司法制裁，咁樣作家咪可以寫一本《香港第一貪官踎監記》囉，到時應該又係一紙風行，榮登暢銷書榜首都有之。
總而言之大家記住，一連七日嘅書展開鑼嘞，係時候享受讀書樂，唔好唔記得支持一下《香城訣》，好嘢嚟o架！