政情：棠哥同余綺華劃清界線
德育及國民教育科話題近期被炒熱，勢估唔到突然會燒到去工聯會身上，相信佢哋一眾領導層都始料不及。講緊嘅係教育工作人員總工會（教總）會長余綺華，佢星期日喺論壇上疑似拍枱大鬧反對國民教育科嘅「學民思潮」代表，結果一舉成名，成為網上惡搞對象。
甚少過問屬會運作
工聯會尋日朝早為九月立法會選舉搞咗個出師儀式，榮譽會長鄭耀棠被問到對余綺華嘅言論有乜睇法，棠哥解釋，雖然教總係佢哋其中一個屬會，但除咗大方向需要一致之外，其他事務都係獨立運作，總部甚少過問，所以余綺華嘅言論絕對唔代表工聯會喎。
對於有報道話余綺華有份領導嘅組織「國民小先鋒」，要學生學晒內地一套，棠哥就澄清，自己唔太清楚事件，所以唔去評論，佢亦冇就德育及國民教育科畀過意見，但就認為呢一科有必要推行。
棠哥不惜同余綺華劃清界線，好明顯就係唔想畀呢件事發酵影響工聯會選情啦！