政情：英姐退休 勤做物理治療
尋日開始退休歎世界嘅立法會勞工界議員李鳳英，回顧過去任內難忘事，相信最深刻會係○九年喺中環舊立法會大樓不慎碌落樓梯意外，搞到要即時入醫院做手術。
英姐話，意外令佢拒絕冧莊嘅意志更加堅定，幾個月前更向外放風話要退休享受人生，最重要係勤做物理治療，至於立法會嘅重任就會交畀勞聯主席潘兆平肩負。
英姐話，雖然當年成功做手術將盆骨移正同取出碎骨，但後遺症至今仍然令佢深受困擾，依家唔可以坐或企得太耐，連落雨行路都有心理恐懼，擔心一個唔小心會再次跣低跌傷。佢又話，手術後因為要即時重返立法會主持調查梁展文事件專責委員會，惟有放棄去醫院接受物理治療，搞到依家已經失去治療嘅黃金機會。
所以英姐退休後嘅首要任務，就係要勤做物理治療，並為勞工權益講座擔任客席講師，仲會去社區中心學書法，等到任職司機嘅老公明年退休後，齊齊去歎世界。