雖然依家市民最終可以喺免費電視台睇到倫敦奧運，但不得不提商務及經濟發展局局長蘇錦樑（Greg蘇）前晚出嚟交代事件嘅蝦碌嘢。話說Greg蘇前日同三間電視台傾到夜晚十點幾先至出嚟交代結果，正當大家好心急之際，Greg蘇就重複又重複話，好高興三間電視台以香港市民嘅期望為依歸，最後仲講錯無綫收費電視播奧運節目，莫非開會開到佢瘟瘟燉燉？
Greg蘇講錯嘢，政府新聞處就好醒目咁「意譯」佢嘅意思，仲好巧妙咁加個括號就「美化」咗成件事。Greg蘇前日話，市民「除咗喺有線收費電視平台外，亦可以喺無綫收費電視平台接收到奧運節目」，而新聞處出稿時就寫成：「市民除了在有線（收費）電視平台，也可以在無綫（免費）電視平台接收奧運這個四年一度的體育盛事」，真係識得善用標點符號。
不過，呢個世代有影片有真相，Greg蘇講錯嘢又豈容新聞處括一括就當無事，可惜我哋尋日苦苦喺網上搵番呢段新聞，但就搵極都搵唔到「足本」片段，真係唔知點解呢？