政情：高永文無悔加入熱廚房
新班子上場只係大半個月，已經困難重重，連食物及衞生局局長高永文都承認，政府呢個「熱廚房」比想像中更加熱。高永文尋日喺電台節目中話，人類處身攝氏六十五度以上就無法生存，如果浸喺四十八度嘅熱水中都會好辛苦，佢話新政府呢個「熱廚房」依家都有四十幾度，的確比想像中熱，但就無悔加入，因為自己預咗要付出，但就覺得對屋企人好抱歉。
對於前發展局局長麥齊光上任十二日就辭職，高永文話事件令佢好震驚，又透露依家新班子每朝開早會時都氣氛凝重，感覺到大家個心都唔舒服，但當「你眼望我眼」時，就感受到彼此仲係互相支持，寄語大家更加團結，迎難而上。高永文又話，新政府推出一系列紓困措施，並非要淡化官員過失，而係回應市民嘅訴求，等市民盡快受惠。
立法會選舉提名期尋日開始，高永文認為官員不應參與任何一位已表明參選人士嘅活動，避免讓人覺得官員影響選舉。