政情：陳茂波願「屈就」做局長
前發展局局長麥齊光因涉嫌騙取政府租金津貼被捕並辭職，特首梁振英（CY）要搵「替補」人選穩定軍心可謂刻不容緩。政圈此際熱傳疑似財政司副司長陳茂波（Paul）臨危受命頂上做發展局局長一職，一直對傳聞不置可否嘅阿Paul尋日突然表明心迹話，如果政府需要幫手，佢會義不容辭，又指做局長未必需要具備工程界專業，間接為自己掃除接任局長障礙，相信阿Paul入閣指日可待。
發展局局長目前由財政司司長兼任，政圈對CY係咪可以喺短期內公布局長繼任人選半信半疑，傳來傳去都只係有阿Paul、特首辦主任邱騰華、以及兩名發展局常任秘書長韋志成及周達明四人。不過，邱騰華早前疑似對外放風話想留任原位，韋、周兩人會否脫離公務員體系亦係未知之數，相反阿Paul一直不置可否，前日更拋出一句：「你叫我點答你？」更令傳聞愈傳愈真。
一向言詞謹慎嘅阿Paul尋日再走前一步，突然接受電台訪問話自己服務社會嘅心志冇變，當問及若政府邀請佢出任發展局局長接受與否嘅問題，阿Paul直率咁話，如果政府需要幫手嘅話，佢會義不容辭，又話做局長未必需要具備工程界專業，好似現任政務司司長林鄭月娥之前做首任發展局局長就做得有聲有色，呢個就係好例子。
對村屋僭建有晒睇法
對於發展局工作之一嘅新界村屋僭建問題，阿Paul亦疑似局長上身有晒一套睇法，佢話呢個問題係「燙手山芋」，又話自己係有原則嘅人，有底線會知所進退。他最後強調政府有團隊協助，局長最重要虛心聆聽，推行政策過程中謀求最大共識同理順關係！
話時話，阿Paul呢番表白基本上係做局長在望，難怪有官場中人事後孔明分析，阿Paul一直虛位以待等做副司長，如無意外應該通過咗品格審查，加上佢為人謹慎，相對出事嘅風險較低，做局長可為日後做副司長預早熱身，照咁講法，呢個位真係非阿Paul莫屬喇。