中環出更：名人發揮文采 作品相繼推出
人氣爆燈嘅灣仔書展尋日開鑼，城中名人都趁墟推出新書，由小說、遊記到政論文章，百花齊放。卓妮都有去湊熱鬧，見到仁濟醫院總理王賢訊（Vincent）同太太朱穎詩（Vincci）嚟谷人氣，事關Vincent用筆名「虎．望晨」寫嘅第一部小說《輔命師－火紅年代》面世，反應唔錯。周日Vincent將舉行簽名會，一眾仁濟總理已約定去撐場。
見到老公躋身作家行列，Vincci都唔執輸，年底有望成為靚女作家。Vincci笑稱，去年懷孕時，老公經常講卡通歷險故事畀肚中嘅囡囡聽，佢聽埋聽埋覺得故事好吸引，於是執筆將古仔寫出來，加埋自己嘅想像，依家已寫夠出三本書，書名暫定為《南山七小福》，故事係講述七隻被壽星公收養嘅神仙狗仔，被派到凡間為人類消災解難嘅遭遇，包括環境污染、人際關係等，主題夠晒正氣，相信大人小孩都啱睇。
項明生旅遊書熱賣
旅遊作家、Sony Computer Entertainment香港董事項明生都去書展巡場，事關佢本《十天敢動假期：秘魯》旅遊書熱賣中，秘魯駐港澳總領事David Malaga特登嚟撐場，周日兩人仲會一齊推介秘魯添！
潮州商會一眾骨幹亦齊集會展，包括會長陳幼南、候任會長周振基（Stephen）、副會長胡劍江及潮青副主任胡炎松等人，齊為《香港潮州商會九十年發展史》出版坐鎮，陳幼南爸爸陳偉南更捐出精美嘅潮州木雕工藝品供展覽。有關發展史由同樣係「家己冷」嘅浸會大學歷史系近代史研究中心主任周佳榮撰文。
卓妮