中環出更：個人遊傳封頂 商界各出奇謀
由「優」字商號組成嘅香港優質旅遊服務協會（QTSA），早前舉行新一屆理事會就職晚宴，香港中藥業協會理事長李應生（Tommy）及莎莎國際主席郭少明，分別冧莊做多一屆協會主席及副主席，到賀嘅政商界名人逼爆會場。近期個人遊封頂嘅呼聲甚囂塵上，協會嘅商戶首當其衝，但Tommy就好淡定話，已經諗好辦法將危機化為商機。
近期內地遊客來港消費模式出現改變，原本豪買百萬名錶、矜貴食材嘅人減少，消費態度趨於謹慎。旅遊事務專員容偉雄就警告，業界要居安思危。
針對未訪港內地人
經營中藥生意嘅百成堂集團主席Tommy話，現有開放嘅城市人口達兩億幾人，無可能個個都嚟過香港，只要針對現有已開放嘅內地城市，做多啲香港優質旅遊宣傳，相信能夠吸引仍未訪港嘅人來港消費。
最近翠華餐廳亦籌備上市，老闆李遠康身價暴升成為城中熱話，市傳太興燒味亦打算上市。不過，太興主席陳永安就喺晚宴上淡定否認，話兩、三年後先至考慮喎！早前太子珠寶鐘錶維修師傅涉嫌監守自盜被判刑，主席鄧鉅明透露，公司因此損失過百萬元，只好當交學費喇。
卓妮