中環出更：遊柬訪貧童 吳傑莊感充實
唔少人去外遊純粹為咗食同玩，但全國青聯常委、金至尊數碼行政總裁吳傑莊（Johnny）就覺得旅遊應該更有意義。Johnny早前同太太去咗柬埔寨旅行，期間暢遊著名嘅吳哥窟、洞里薩湖，仲探訪當地嘅貧窮兒童，此行令佢對人生有唔少體會。
Johnny參觀咗吳哥窟歷史博物館，又到訪金邊王宮，引發無限感慨。Johnny話，吳哥王朝以前曾經係中南半島嘅強國，泰國同越南都收歸旗下，其後因內戰喪失領土，只剩吳哥窟遺迹等世界文化遺產。所見所聞，令佢更加珍惜現有和諧，希望中華民族要團結自強。
期間Johnny夫婦同團友探訪當地貧窮兒童，仲預備咗文具、衣物同糖果送畀小朋友，旅程充實愉快。不過，講到食，Johnny就敬而遠之喇，事關當地人愛食昆蟲，炸蜘蛛、蟋蟀、烏龜擺在眼前，睇見都毛管戙。至於家禽，佢話啲雞瘦到甩毛，牛又無乜肉地，惟有食齋喎。