旅巴大軍日日泊行人路
「朝朝十點開始就陸續嚟，晏晝十二點最爆棚，直情泊晒上行人路，真係好過分！」居於紅磡的嚴先生指出，大環道一帶每日均有大批大型旅遊巴士停泊，對附近居民出入構成嚴重影響，「啲大巴係咁泊晒上行人路真係好危險，我見過有一架仲撞爛咗個路牌，如果撞到人就慘啦！」
警方發言人表示，過去半年曾接獲一宗有關上址有旅遊巴違泊造成阻塞之投訴，並曾發出十八張定額罰款告票，強調會繼續留意上址情況，及採取適當行動打擊違例泊車。
「半年抄十八次牌都好似冇乜用，根本見唔到啲大巴有收斂，其實政府可以考慮吓其他方法，好似喺大巴經常停嘅位加個花槽，等啲車冇咁易剷上行人路！」嚴先生認為警方執法未能有效打擊違泊問題，又指上址一帶近年有新住宅大廈入伙，愈來愈多居民出入，促請政府正視問題。