好消息！教育局同書商嘅拉鋸大戰終於結束。壞消息！拉鋸鬧劇雖然落幕，但教科書繼續起勢加價，家長繼續任人魚肉，學校繼續被人玩殘。
咁即係點呀？即係港府跛腳無能囉，搞咗一場所謂分拆教材嘅大龍鳳，最後又係無功而還，爛尾收場。舊時話，富不與官爭，今日居然係官唔夠商鬥，簡直丟架！
講起呢場官商惡鬥鬧劇，真係火都嚟埋！教科書年年加價，港府年年冇符，到咗今年先至忽然「強硬」，突然轉軚容許學校繼續免費索取教師用書，向書商施壓。港府倉卒出招，結果點呢？四個字：一敗塗地。書商唔止企硬拒絕免費向學校提供教師用書，新學年教科書繼續按計劃加價，三成分拆教材嘅課本平均加幅百分之二，部分加百分之四；而未分拆教材嘅課本平均加幅百分之四，最高加百分之八添，明剃港府眼眉。大家話嘞，港府搞教材分拆搞咗三年，得出咁嘅結果，係咪一敗塗地吖？
所以話，港府向書商開戰，表面強硬，係威係勢，實質根本係無牙老虎，唔止逼唔到書商減價，家長要繼續捱貴書，家陣仲搞到學校要為教師用書頭痕。教育界批評，當局同書商爭拗，令學校同教師無所適從，質疑教育局決策錯誤。冇錯嘞，呢場教科書大戰，搞到滿城風雨，結果書商無輸，輸嘅只係家長同學校。當然啦，最大輸家就係港府，威信蕩然，教育局呢鋪可以話連底褲都輸清光。
唉，港府窩囊，書商無品，家長年年淪為人肉提款機，講起真係無奈。最驚嘅係，今年鬧劇落幕，但書價問題其實未解決，爭拗沒完沒了，出年學校又成磨心，家長又被魚肉，學生又遭玩殘，咁就該煨咯！
與其治標，不如治本。解開教科書死結嘅關鍵，始終就係港府必須承擔責任，教育局既然制訂課程，審批課本，做埋統籌出書又有何難？點解偏偏要將事情搞得咁複雜、咁棘手呢？
一句到尾，港府根本係不負責任，縮骨卸責，唔想將包袱孭上身。港產官僚天不怕、地不怕，最怕麻煩、最怕孭鑊、最怕辛苦，所以咪闊佬懶理，關人個關囉。家長被魚肉、學生被玩殘、學校變磨心，佢哋一概話之你。
有教育團體認為，教科書問題搞到滿城風雨，局長孫明揚同副局長陳維安需要為事件問責，扣薪一個月。計功夫茶話齋，高官減薪根本於事無補，趁政府就嚟換屆，炒晒班庸官就差唔多！