政情：白衣天使搞喊陸志聰
正所謂「男兒流血不流淚」，喺廣華醫院出世、仲做過廣華醫院行政總監嘅現任瑪麗醫院行政總監陸志聰分享「那些年」第一次畀人整喊嘅經歷，佢話當佢聽到最後一屆廣華醫院護士學校畢業生唱歌，就畀班「白衣天使」感動到眼濕濕。
尋日陸志聰出席廣華護士紀念護理教育九十年嘅新書發布會，食咗一碗護士炮製嘅傳統及第粥，真係甜在心頭。
陸志聰係廣華醫院一九六一年「出品」，直至長大後去廣華醫院做行政總監，驚嘆同醫院好有緣。最難忘○二年出席最後一屆廣華醫院護士學校畢業禮，畢業生當時唱起名DJ麥潤壽嘅首本名曲《在晴朗的天空下》其中一句：「一早決心，將我愛笑的心，感染世上愛哭的人。」佢就覺得護士喺幫病人嘅過程，內心應該得到快樂：「我以為自己好硬淨，第一次忍唔住喊！」