政情：Eva鄭忽然主動數功績
夕陽政府就嚟換屆，運輸及房屋局局長鄭汝樺（Eva）日前畀人問到去留問題時，佢就唸詩暗示乜都已經睇透晒。點知尋日佢喺立法會財委會通過沙中線撥款後，佢就係咁為自己數功績。之不過，復建居屋呢個問題政府都係要畀人逼到埋身至做，一手樓規管仲喺審議階段，立法會「拉布」得嚟今屆都唔知能否通過。Eva咁快就計埋落自己張成績表度，未免早咗啲喎。
Eva日前先用唐代詩人李翱嘅禪詩「雲在青天水在瓶」，以為呢位施主已經乜都放低晒。但尋日佢就主動咁數自己任內嘅功績。Eva話，呢五年嚟佢哋得到立法會超過二千億元嘅撥款，令「一橋、五鐵、三主要幹道」都可以成功啟動，創造咗超過五萬六千個就業職位。
至於佢係唔係重運輸、輕房屋？Eva就即刻反駁，話佢哋有切切實實繼續發展公屋，亦有就復建居屋下工夫，一手樓銷售規管法例亦都做緊。
房屋問題係呢屆政府留低嘅好大問題，搞到民怨四起，數到呢方面嘅成績，又確實係唔多光彩嘅。