中環出更：區詠梅豪住大澳文物酒店
由大澳警署活化而成嘅大澳文物酒店，開業兩個多月，booking爆到極。名媛區詠梅（Margery）兩個月前訂房，日前與外國朋友入住，感覺如置身「東方威尼斯」，度過難忘的兩日一夜。
生於大富之家嘅Margery，自小周遊列國，唔同風格嘅酒店都住過唔少。佢聽聞大澳文物酒店限量「供應」九間房，一口氣訂五間。大女羅舜然、孫兒Alastair，及五位好友拉隊入住，幾乎包場。
警署變身懷舊味足
酒店裝潢簡潔中見豪華，房租每晚要二千多元，但Margery認為物有所值，大讚呢幢由大澳警署變身嘅酒店，懷舊味十足。當中保留兩所舊式監獄，更係必到景點，佢同孫兒爭住影相。
一場嚟到大澳，一行人把握機會逛市集。當地鹹魚、蝦醬、蠔豉好馳名，Margery趁機掃貨，準備母親節當日煮花膠及鮑魚，氹九十八歲媽咪開心。
逛市集掃貨擦大餐
Shopping完畢，都係時候歎吓大澳嘅風味海鮮，Margery就揀咗一間中式酒樓，柯打新鮮龍蝦、蒸石斑等食物，食到大家舔舔脷。
美中不足嘅係交通唔方便，又坐船又坐車，至去到呢個世外桃源。
卓妮