阿媽教落，凡係食落肚嘅都要小心，如果唔係好易出事。呢家嘢，功夫茶細細個就銘記於心，直到長大成人之後忽然發覺，原來好多人冇阿媽o架！
點解咁講呢？如果冇阿媽，唔通真係石頭爆出嚟？即係咁，當你見到內地咁多黑心食品，而香港亦有唔少貨不對辦嘅保健產品，你就會懷疑無良奸商係冇老母嘅，細個嘅時候冇人教佢哋「病從口入」嘅道理。最低限度，呢班友仔冇家教囉，硬係要以假貨或者次貨呃人。
好似海關最近一宗行動咁吖，抽查市面上十八款魚油丸樣本，發現當中六款樣本嘅DHA同EPA含量較標籤聲稱為低。海關總共檢獲一千六百樽相關魚油丸，總值六十一萬元。海關話呀，暫時冇證據顯示食用呢一類魚油丸對身體構成乜嘢影響，但誇大DHA同EPA含量就涉嫌違反商品說明條例。到底誇大幾多呢？其中一款同實際差距最大嘅樣本，含量少咗九成呀，冇陰功！
美國衞生研究院指出，DHA同EPA有助減低心臟病風險，減少三酸甘油脂，預防心律不正等等。違反商品說明條例，含量較標籤聲稱為低，即係偷工減料啦，雖然都係傷天害理，但係都叫做不幸之中嘅大幸，唔會食死人吖嘛。最驚嘅係嗰啲攞你命嘅所謂食療，隨時真係奪魄勾魂。
冇耐前之嘛，一位患有充血性心臟病等多種疾病嘅八十歲婆婆，向中醫師求診獲處方含製附子同製川烏嘅中藥，第二日搞到不省人事以及脈搏加快，送去瑪嘉烈醫院搶救無效死亡。衞生署話喎，中藥製附子受到另一種同樣含有烏頭類生物鹼嘅中藥製川烏污染，署方指令全面回收受污染藥材。
功夫茶想問，乜中藥冇監管嘅咩？點解受到污染都冇人知？衞生署嘅後知後覺，間接害到一位婆婆中毒身亡。
其實類似慘劇仲有好多o架，醫管局中毒諮詢中心○八至○九年接獲一百九十一宗個案，都係食中藥導致肝臟受損，三十二人急性肝衰竭，其中二十四人死亡，你都咪話唔恐怖！
所以話啫，好多人真係冇阿媽教o架，包括負責食品以及藥材安全嘅食衞局。試問，如果食衞局局長周一嶽從小被教導凡係食落肚嘅都要小心，點可能管理失敗到香港久不久就響起警鐘？今次響警鐘嘅係魚油同中藥，下次又唔知係乜咯。
功夫茶好肯定，魚油偷工減料，中藥受到污染，只不過係冰山一角，事關周局長每日淨係帶個軀殼上班，靈魂係冇返工o架。既然係咁，七月一日之後換一個肯帶靈魂返工嘅新局長吖，唔該！