政情：孫公歸位 即到立會拆彈
近年身體不時出毛病嘅教育局局長孫明揚，放完病假後尋日首度現身立法會回應議員質詢。一直被譏為「洗腦」教育嘅德育及國民教育科，雖然政府被迫跪低「微調」內容，但外界仲係好驚國民教育洗腦，孫公即刻發揮其「拆彈」嘅看家本領，話國民教育係關於國家大事，會要求學生認識「事情嘅本質」，「唔單止睇光明面，黑暗面或其他方面，我哋都去睇」。
雖然孫公無解釋乜嘢係「黑暗面」，但為國民教育「拆彈」而敢講國家大事有黑暗面，都算夠膽識。其實孫公喺官場打滾多年並唔係浪得虛名，佢其中一招必殺技就係「拆彈」，多得貪曾管治無方，令孫公不時要出招。