泛民主派尋日採取拉布策略，玩到建制派完全謝晒，個個都無晒心機兼發脾氣。議事規則委員會主席譚耀宗尋日好勞氣，話下星期二開會檢討現行議事規則，睇吓有無方法可以拆解拉布策略，但佢都好老實話，現時都諗唔到有乜方法阻止議員拉布，希望其他議員畀吓意見喎。但通常修改議事規則都係好難通過嘅，所以睇怕都係煲「無米粥」居多。
身兼內務委員會主席嘅自由黨主席劉健儀又加把口，話擔心再係咁拉布，好多重要議題都要被迫押後，已經請秘書處研究對抗方法，或者參考吓外國議會嘅經驗喎。
班建制派議員之所以咁係有原因嘅，事關泛民尋日經常以「法定人數不足」呢招玩拉布，搞到好多建制派議員飯又唔敢食，廁所都唔敢去，好似進出口界議員黃定光被記者問多兩問就發爛渣話：「坐咗咁耐，去洗手間都得啩！」