政情：包山后孖學生 練詠春籌款
「蜘蛛女」搶包山后鄭麗莎（Lisa)唔單只身手了得，仲愛心爆棚，上周六晚佢蟬聯包山后寶座後，翌日隨即為本月十九日舉行嘅國際培幼會「愛．女孩」籌款晚會表演綵排。擔任愛心大使嘅Lisa，當日同鮮魚行學校學生一齊練習詠春，仲特登喺長洲帶咗啲造型可愛嘅平安包鎖匙扣送畀同學仔做獎勵，氹到大家不知幾開心。
身形fit到漏嘅Lisa，當日準時到達學校擔任導師協助同學仔綵排，見佢好有耐性咁幫同學仔執正詠春嘅姿勢，又親身示範唔同嘅拳法，同學仔都齊聲話獲益不淺。
對於同學仔咁積極投入綵排，Lisa都話好感動，亦好希望今次表演可以籌募更多經費，以捐助「愛．女孩」基金，幫助中國、巴基斯坦同非洲加納等地嘅婦女改善生活、爭取權益喎。
Lisa仲透露，當晚佢仲有一個神秘表演，唔知佢除咗識詠春外，仲收埋乜嘢秘密武器呢？