政情：新社聯砌民記爭選新東
民建聯近年為發展得罪唔少人，特別係該黨部分領導層愈來愈剛愎自用，唔理其他人意見，好似該黨副主席劉江華屬意自己嫡系人物、沙田區區議員葛珮帆（EQ）領軍出戰新界東，加埋現任立法會議員陳克勤，務求保住兩席。不過，近日新界東地區有傳話該黨內部無人肯排EQ條隊抬轎，仲有聲音希望力推新界社團聯會（新社聯）理事長陳勇取而代之，原來當中又係利益作怪。
可能大家未必知道新社聯乜嘢來頭，有乜本事同民建聯爭位呢？記得民建聯九二年成立時，只不過係一間空殼公司，無人無物外，就連支持亦唔足夠，之所以可以不斷發展，全因唔同地區組織義無反顧幫手拉票，其中新社聯就係新界地區一個實力雄厚嘅組織，會員人數已經去到十九萬。有地區人士就話，政府近年喺新界地區嘅發展，好多時要諮詢新社聯意見。
望改善現行甄選機制
新社聯過去一直為他人作嫁衣裳，但近年銳意擴張，會長梁志祥已經成功爭取喺新界西主打新社聯名義出選，本來佢哋喺新界東都有意派人，可惜EQ得到劉江華力保出選權。不過，事件發展到近日竟然有轉捩點，新社聯唔少新界東兄弟希望推薦陳勇出選，一來有傳EQ地區支持唔係想像中咁勁，大家怕派佢領軍有危機，二來就係希望藉此改善該黨現行甄選機制，簡而言之就係希望該黨大佬唔好用人唯親囉。
消息人士話，陳勇喺眾人推薦下，已經開始同EQ比併，雖然最終未必可以如願，但如果唔畀佢試嘅話，相信好多兄弟都唔甘心。消息又話，只要有公平嘅遴選，即使最後仍然係由EQ出選都無所謂，至少向新社聯內部都好交代咁話，到底民建聯會否從善如流，好快會有分曉。
講開又講，新社聯明日會同候任特首梁振英會面，據聞席間會力推成員之一嘅民建聯北區區議會「票王」劉國勳加入政府。至於點解佢哋咁把炮可以唔使理會民建聯嘅遴選結果，消息人士就講咗句：「都要睇睇個組織夠唔夠力嘅！」明晒，真係盡在不言中。