中環出更：張燊悅避談老公前途
自由黨今日會見候任特首梁振英（CY），除咗傾新政府架構重組，仲會向CY推薦黨員入政府。不過，唔好話推薦新人，舊人都未知有無得留低，好似該黨前立法會議員楊孝華公子楊哲安(Jeremy），未知能否續任教育局政治助理一職，但佢太太張燊悅（Nicola）就似乎唔多擔心，輕鬆行街Shopping。
Jeremy官運未卜，但卓妮尋日下午就喺中環ifc商場遇到戴住「黑超」嘅Nicola行街，先行入Apple Store睇嘢，繼而去睇化妝品。Nicola見貨架上有潤手霜tester任試唔嬲，於是小心翼翼地除下約三卡鑽戒並含在口中，然後熟手地將潤手霜塗上手背捽幾捽，感受下質地如何，但試過都係唔啱心水，拿拿臨戴番隻鑽戒離開。
行街睇新衫即醒神
之後佢轉而逛下電話舖，但都係齋睇唔買。直至見到ZARA時裝店外新衫林立，即時醒晒神，唔理店內客人眼望望，索性除低「黑超」睇真啲，先試平底涼鞋，再睇夏裝衫，樂在其中。卓妮上前打招呼，Nicola禮貌地報以微笑，問佢老公係咪會過渡新班子做政治助理，佢就笑笑口話：「不如你問番佢（楊哲安）啦！」仲話想專心行街喎。