中環出更：陳冉食晏 要人睇水
候任特首梁振英（CY）十分重視團隊合作，分工精細之餘，成員之間亦守望相助。話說尋日下午一點食晏時間，卓妮途經中環舊政府總部西座皇后大道東出口時，見到候任辦公關主任洪綺敏（Cathy）喺門口四圍望，望咗一陣佢就離開，五分鐘後就見到呢期好紅嘅候任辦項目主任陳冉外出食飯，擺明就係Cathy幫陳冉睇水啦！
自從陳冉被爆唔係「三粒星」嘅永久居民兼入過共青團後，頓時成為鎂光燈焦點，初出茅廬就遇到咁大單嘢，難怪佢會步步為營。之前卓妮經過舊政府總部遇到Cathy，佢話如果有記者喺度守候，陳冉點會落嚟吖！難怪尋日佢會幫陳冉先落樓踩線。不過，只係估唔到人工高過陳冉差不多一倍嘅Cathy，竟然咁抵得諗幫同事睇水啫。
陳冉安全落樓後，一個人行咗去對面嘅渣打銀行地庫一間海鮮酒家，原來佢約咗兩位男性友人一齊食晏。
被問前程 笑而不答
可能佢以為出門口唔見記者就好放心，所以見到卓妮就顯得有啲愕然，反問：「點解你會知道我喺度嘅？」卓妮趁機問佢變成紅人後有無壓力？七一後會唔會繼續幫CY手？陳冉笑而不語，之後卓妮都唔好意思阻佢哋食飯喇。
卓妮