食署任餵野鴿易播禽流
鍾小姐不時途經灣仔三板街，發現經常有人餵飼野鴿，「唔知咩人，總之久唔久就倒一大堆麵包碎喺度，引晒啲白鴿嚟開餐，叫人唔好餵鴿嘅告示一啲作用都冇！」
食物環境衞生署發言人表示，有關告示於去年十二月在上址擺放，用以提醒市民切勿餵飼雀鳥。該署接獲本報轉介後已即時派員巡查，並未發現有人餵飼野鴿，但會繼續加強巡視上址，並在適當時候採取執法行動。發言人又強調，違例餵鴿者最高可被判罰款二萬五千元及監禁六個月。
灣仔區議員李碧儀指，餵鴿會影響環境衞生，「近呢兩、三個月呢區愈嚟愈多野鴿，仲成日飛去大廈窗口，又有雀屎，搞到居民好擔心隨時有禽流感。」李認為食環署除勤加清洗外，亦需加強檢控餵飼野鴿人士。