人生能得幾回跪？環境局局長邱騰華以親身演繹話畀大家知，人生真係可以跪完再跪㗎。呢，繼舊年擴建將軍澳堆填區觸礁之後，港府興建焚化爐計劃日前又被立法會否決，邱騰華搞環保一事無成，最叻就係添煩添亂，唔怪得衰完又衰，跪完再跪啦！
跛腳鴨政府胡混度日，得過且過，平時唔做嘢，偏偏臨收工先至整色整水，推出多項重大民生政策，包括爭議多多嘅興建焚化爐大計。邱騰華話喎，現時三個垃圾堆填區六年後就會爆滿，處理垃圾問題迫在眉睫，有必要三管齊下解決問題，包括源頭回收、堆填及焚化，所以興建焚化爐有迫切需要。
鬼唔知阿媽係女人咩。香港地少人多，人均垃圾量冠絕全球，堆填區遲早爆棚，興建焚化爐勢在必行，呢啲道理細路仔都知喇。問題係，喺石鼓洲興建焚化爐，唔止涉及巨額公帑，引起居民及環保人士激烈反對，大部分議員亦質疑相關計劃未獲下屆政府支持，日後隨時要「急煞車」，邱騰華明知阻力重重，仲要夾硬闖關，唔撞板至奇。環境局事後被迫發表聲明，話焚化爐方案不獲議員支持，現屆政府無法於任內再向立法會申請撥款，並趕及完成有關程序喎。簡單講，即係冚旗咁解，呢啲咪叫做唔衰攞嚟衰囉。
話時話，邱騰華推行環保政策冇樣掂，唔係被剝牙，就係跪低，大家都見怪不怪咯。最好笑係，港府Ｎ年前已經話要起焚化爐，點知議而不決，一拖再拖，拖到依家連立法會呢關都過唔到，真係講都冇人信。冇錯，部分議員係出於政治考慮，為反對而反對，但佢哋今次唔係完全冇道理㗎，港府環保政策全無長遠計劃，只知頭痛醫頭，腳痛醫腳，起完焚化爐之後，如何做好垃圾回收，從源頭減廢，當局隻字不提，議員唔反對就假。講到底，如果唔係邱騰華自己實在太廢，都唔使咁丟架喇。
所以話，夕陽政府百事哀，雙非問題被梁振英喝停，興建焚化爐又被立法會否決，到頭來一事無成。難為煲呔曾仲唔認係跛腳鴨，大大聲話六月三十日前佢話事，真係唔知醜字點寫。
正如有人話齋，港府高官不嬲胡混度日，尤其係邱騰華之流，一向講多過做，環保毫無建樹，藍天白雲愈叫愈走，依家臨收工先至博表現，無非想留任下屆政府，繼續庸官我自為之嘅啫。其實，人貴有自知之明，邊啲官員可以留低，邊啲官員必須叮走，相信梁振英心中有數。一句講晒，塵歸塵，土歸土，垃圾歸垃圾，廢官早抖喇！