開講都有話：知恥近乎勇。那麼，不知恥又近乎乜呢？依老朽話，係近乎狂！前者如台灣總統馬英九，他在競選連任時於平安夜接受電台訪問時自我調侃：「當家三年，連狗都嫌。」後者如貪曾，臨收工仍耗巨額公帑遠赴新西蘭及南美逍遙遊，返港時在記者招待會被問到是否被架空，現政府是否已淪為跛腳鴨，佢竟疑似江湖大佬上身狂吼：「六月三十日前我話事！」
香港呢個福地，就咁喺佢「話事」下沉淪！公務員「廉潔奉公」嘅底線佢守唔住，高官可放火，公務員不能點燈嘅惡行喺佢身上反射出來，公務員所信奉嘅「程序公義」全被拋到九重天！
民生問題貪曾向來少理，自己「貪遍省港澳，歎盡海陸空」，令全港市民蒙羞，立會日前破天荒向佢提出不信任動議，可惜一眾保皇黨護短有功，遂令林公公之流嘅「人肉錄音機」可以力頌嘴角滴油、華衣甩掉、煲呔斜落嘅貪曾連串「政績」，難道大家唔相信一粒老鼠屎壞了一鍋湯？難道大家相信掉落糞坑嘅吉品鮑，撈起來再用水沖擦淨仍是一隻貴價好味嘅吉品鮑？
講真，如果你唔知道「真相」，也許你會嗒得十分滋味！然而，你知道了「過程」，要你啃咗隻「有味」鮑，恐怕黃膽水也會嘔出來！
跛腳鴨時日無多，全城焦點都在CY一言一行上，貪曾的狂吼，老朽只看到有着某種荒唐可笑！權之必落，還佯狂到最後一刻，真是死性難移！