候任特首梁振英（CY）尋日又帶住佢個用咗三十年嘅招牌陳年舊皮包，出席立法會西九事件專責委員會研訊，有議員就同佢講笑，話連老闆都對環保身體力行用舊嘢，下任環境局局長肯定好大壓力。雖然仲未知下屆邊個坐呢個位，但估計現任局長邱騰華好想留任，唔係點會不惜曲解CY嘅環保政綱，強推興建焚化爐爭政績吖！不過，佢任內多項環保政策都觸礁收場，即使佢肯承諾今後全身都用舊嘢，估計都未必有得留低喇。
