立法會議員喺議事廳辯論就見得多，但煮嘢食就好少見。尋日中電同扶康會喺荃灣搞咗個烹飪比賽，多位議員同智障人士夾手夾腳一齊拍檔煮嘢食。
喺議員劉慧卿同陳淑莊兩名女將雙雙缺席嘅情況之下，參加多年但都無獎攞嘅民協馮檢基（KK），就同拍檔以火龍果同豬肉炮製嘅「喜慶紅桃」，奪得最合拍大獎，認真出人意表。
KK憶述，當年喺英國留學時，佢為咗賺取生活費而要到餐館打工，餐館老闆同大學嘅師兄就教佢整滷水雞、叉燒、燒肉等傳統食品，嗰段經歷令佢終生難忘。
KK仲話，其實滷水雞無大家想像中咁難整，又話當時一隻滷水雞可以食足一個星期喎。不過，KK話已經放低咗鑊鏟三十年，煮飯全部由老婆代勞，難怪佢過去喺呢個比賽未攞過獎喇。