政情：嫻姐唔認係「保梁局」主席
工聯會榮譽會長陳婉嫻喺特首選舉期間力撐梁振英（CY），雖然惹來閒言閒語，但嫻姐一於少理，結果證明佢獨具慧眼。雖然特首選戰已成定局，但嫻姐尋日出席一個論壇時，又被主持人提起有人話佢係「保梁（梁振英）局」主席，搞到佢鬼咁尷尬。
嫻姐事後話，自己從來無做過「保梁局」嘅角色，只係好耐之前，當社會大部分人覺得唐英年做硬特首嘅時候，佢力排眾議有第二種意見，所以先畀人有呢種錯覺。
近期社會熱烈討論下屆政府問責班子人選，工聯會有卅幾萬會員，到底佢哋會否派人入政府呢？嫻姐就話，工聯會如果有人入政府嘅勞工或福利部門亦係好事，但一定要確保能夠影響政府施政，以及反映到打工仔意見，若只係一味聽指令做嘢，咁就入都無謂喎。