政情：董建華「密會」唐唐任總？
特首選舉搞到香港風起雲湧，雖然現已告一段落，但建制派之間嘅矛盾仲有排都搞唔掂。不過，希望大和解嘅何止候任特首梁振英（CY）一個，我哋尋日就見到盛傳支持CY嘅全國政協副主席董建華，與落選咗嘅唐英年同佢嘅兩位中堅支持者，前後腳走入一間酒店，唔通係「大和解」壓軸篇？
粵劇名伶白雪仙尋晚喺灣仔一間酒店慶祝八十四歲大壽，到晚上七點許，董建華、唐英年夫婦、前金管局總裁任志剛夫婦，以及前財政司司長梁錦松夫婦分頭到場，唔通係為仙姐賀壽？但我哋問過有份出席壽宴嘅人士，就聲稱宴會上冇見過老董同唐唐喎！
眾所周知，董建華係一位「老好人」，做乜都興講「以和為貴」，身為國家領導人嘅佢，突然同唐唐及佢嘅重量級支持者同場現身，唔通係想傳達中央指示，希望大家放下成見、一心一意為香港籌謀？