政情：專一碧樺依 擔心「嫁錯郎」
去年高票當選特首選委嘅社福界女神碧樺依（Raees），早前加入咗婦女事務委員會後，坊間同時亦有傳佢會加入新成立嘅工黨，為少數族裔發聲。Raees尋日就澄清話自己仲未加入工黨，但強調並非唔認同工黨嘅理念，而係工黨仍然處於醞釀階段，佢想觀察多一陣先至決定，費事入錯政黨嫁錯郎喎。
Raees話，未決定加入工黨並非因為佢已經心有所屬，而係因為覺得自己係個從一而終嘅人，唔想入咗工黨後先發覺唔啱心水而要轉黨。
立法會選舉工作就快展開，Raees笑住話，暫時仍未有人搵佢做義工，如果工黨想搵人氣爆燈嘅Raees幫手做宣傳，睇嚟都要盡快行動喇！
最近Raees正埋首展開有關港人身份認同嘅政策研究，佢話喺雙非孕婦事件及外傭居港權官司，唔少市民寧願放棄司法獨立都要提請人大釋法，令佢心痛之餘，亦激發佢研究呢個題目。