政情：新人難上位 民記傳內訌
各黨派已密鑼緊鼓為九月立法會選舉部署，好多細黨派樁腳唔夠，想爭議席都好難，相反好多樁腳嘅民建聯就自亂陣腳，第二梯隊為出選爭崩頭。話說該黨銳意力推新人出選，可惜黨內部多門多派，各派系元老除咗唔肯退位外，仲有私心想推自己友上位，令一啲非我族類、有潛質嘅新人無機會參選，結果引起黨內部分人不滿，內訌一觸即發。
民建聯一班具潛質嘅年輕黨員上位無期，主因係黨內元老唔肯退位讓賢，結果四年又四年，一直只係撈個區議員。好似該黨北區區議員劉國勳咁，話晒都係區議會選舉嘅「票王」，點秤都多票啲，加上作為特首選舉委員會選委嘅佢，一早已經揀定力撐梁振英，都算為黨攞過彩，可以話係九月出選新界東嘅最佳新人，原本行情看漲，但如今似乎都凍過水喇。
我哋之前講過，劉國勳同沙田區議員葛珮帆（EQ）都有意出選，但作為資訊科技界選委嘅EQ曾經「撐唐」，唔少人對佢出選都有微言，令挺梁嘅劉國勳出選看高一線。不過，EQ係副主席劉江華愛將之一，最近仲傳出EQ爭贏咗出線權。早前有傳黨內一班年輕黨員建議劉國勳改循區議會功能組別出選，但預計坐緊呢個議席嘅葉國謙點都唔會走，所以呢條路都係行唔通。
張文韜空降 截張國鈞胡
該黨除咗新界東爆內訌外，九龍西嘅出選安排亦惹來年輕黨員不滿。一直選開九龍西嘅李慧琼轉戰超級區議會已經通晒天，原有嘅空缺本來係該黨副主席張國鈞嘅囊中物，以為守得雲開上到位啦，點知又畀人截胡。最近該黨密謀安排即將離任嘅發展局政治助理張文韜空降九龍西參選，佢喺政府做咗乜嘢無人知道，講個名出嚟亦未必有人識，如今冷手執個熱煎堆，據聞都係多得曾鈺成一錘定音。
所以話呢，就算一班年輕黨員幾有潛質都好，無後台始終無用，加上班元老唔肯退位兼大玩親疏有別提攜自己友，想出頭真係好艱難，難怪惹來部分年輕黨員強烈不滿，要求黨高層正視問題。